Книга Надії Вархоловой – ЗВІДКИ И КОЛИ

На кинцю ного року, «Спілка українских писменників Словаччини» выдала книжку працовничкы Музея українской културы во Свиднику Надії Вархоловой – ЗВІДКИ И КОЛИ. Иде о першу публикацию на Словеньску, в котрий ся презентує жанер народной творбы, пригадок, приповидок, в котрых ся гварит о минулости нашых русинскых сел и о тім як взникали их назвы. Публикация обсягує материялы з цилой руснацкой околици, то значит од Левочи, Старой Любовні, Бардова, Свидника, Лабирце, Вароша, Гуменного, Снины.

Авторка зозбераный материял зарадила до трёх капитол. У перший капитоли мож найти топонимицкы пригадкы о заложиню та одводжиню назвох сел. Друга капитола є венувана топонимицкым назвам споєным з природныма указами як сут верьхы, жерела, хотари. Авторка ся у тий капитоли венує ай взнику назвох градів, замків, каштелів и монастырів. Третя капитола обсягує народны прозывкы дакотрых сел, авторка розоберат довод их взнику а на кинцю капитолы сут приведены словны гры, каламбуры, синонимы, омонимы связаны з говоровыма звлашностями конкретных сел.

Книга є написана в українчинї, автентицкы записы сут приводжаны в говорох конкретных сел. Книга обсягує и резюме у словацкым та анґлицкым языку и є обогачена старыма фотками з нашых сел.

Кидь хочете прочитати тоту барз интересну книгу, гледайте пид: Nadežda Varcholová. Odkiaľ a kedy... Vydal Spolok ukrajinských spisovateľov na Slovensku. Tlač Alldata v.o.s. Prešov – Svidník, 2009, 232 s.

Тот чланок был написаный на основи материялив:

Odkiaľ a kedy..., Dukla 06, 8. február 2010, s.8

Nadežda Varcholová vydala zaujímavú knihu s názovm ODKIAĽ A KEDY..., Podduklianske novinky 6/10, 8. február 2010, s.10-11