Русиньска вікіпедія ся родить во вікі-інкубаторї

Велё языків, діалектів і докінце пару умелых і вымертых языків мать свою вікіпедю.  Наша вікіпедія ся помаленькы родить і не треба довгый час, жебы узріла світло світа. Уж теперь, во вікі-інкубаторї  мать веце статей як дакотры уж схвалены вікіпедії. Што іщі хыбить є, жебы были пару місяцїв холем трёми приспівателї котры зроблять мінімално десять едітовань каждый місяць.

Русиньска тестова вікіпедія є ту:

http://incubator.wikimedia.org/wiki/Wp/rue/%D0%93%D0%BE%D0%BB%D0%BE%D0%B2%D0%BD%D0%B0_%D1%81%D1%82%D0%BE%D1%80%D1%96%D0%BD%D0%BA%D0%B0

І штатістіка приспіваня ся дасть найти ту:

http://toolserver.org/~pathoschild/catanalysis/?cat=0&title=wp/rue&wiki=incubatorwiki_p

Пару рекомендацій:

1. Не пиште першу вету як словникове гесло, але як повну вету
2. Не забудьте ся рядити правилом про звыразнїня, подля котрого мають быти слова хоснованы в надписї статї звыразнены в текстї, кідь ся дасть та такой на першім рядку
3. Не робте собі великы старости, же дашто попсуєте. Правдоподобно хыбы зробите. Каждый зробить ці меншу ці векшу хыбу. По вас прийде дахто другый і тоту хыбу справить
4. Не дуплікуйте статї. Передтым як зачнете писати перевірте ці така сторінка уж не екзістує
5. Не мажте хосновный обсяг сторінок
6. Не працуйте з вікі як з діскузным фором. Є дуже легке ся на діскузных сторінках запоїти до емоціоналных дебат на різны темы. Покы то не приспіє ку вылїпшіню статї, што і векшынов не приспіє, лїпше є такы дебаты обыйти.
7. Не предпокладайте же за даяков сторінков є конкретный автор
8. Не ставляйте ся до боёвой позіції. Векшына людей такой порозумить, же Вікіпедія є громадов людей завязаных ку сполупраці і досягнутя приятельской згоды. Найдуть ся і такы, котры незгоды во Вікіпедії ставляють на уровень особной уражкы. Векшына острїляных Вікіпедістів але не мать інтерес травити час несмачныма спорами.
9. Не судьте і не пробуйте змінити Вікіпедію скоре, як єй порозуміте. Усвідомте собі, же Вікіпедія є робота за ходу і много інтеліґентных людей на ній робить і залежыть їм на ній. І тыж о ній велё роздумовали. Дакотры люде прийдуть і ани жебы порозумили, як і чом Вікіпедія фунґує, зачнуть жадати векшу контролю, або судять цілый проєкт на основі новых недокінченых сторінок або інакше нецалых статей.

Кідь мате даякы коментарї, пропозіції ці вопросы пиште на ruedev(at)gmail.com