Лемківске інтернетове радіо Lem.fm од 1. юна 2011

Од 1. юна зачінать высылати лемківске радіо з Кракова.

З пересвідчінём, же теперь є час, же кідь хочеме, так ся дасть здобыти велё, ішли лемківскы пасіонаци радія до конкурзу о ґрант польского міністра загранічных дїл. Міністер посмотрив на жадость прихылным оком і дав їм 100 тісяч злотых на забезпечіня штудія, про путованя новинарїв ітд. Радіо буде спочатку лем інтернетове но творцї до будучности роздумують і о высыланю през етер. Буде там робити 6 особ, як професіоналны новинарї так і люде котры іщі не сидїли перед мікрофоном. Єден з творцїв радія пан Боґдан Ґамбал повідав, же в радію буде мочі чути оріґіналны проґрамы як історічны проґрамы або лекції лемківского языка. Самособов буде высылана і музика з перевагов етнічной. Уважує ся о трансмісіях ґрекокатолицькых ці православных служб Божых. Проєкт є амбіціозный і планує ся высылати 24 годин каждый день і кажду годину будуть высыланы місцёвы і світовы вістї.

Вірю, же тота несподївана новина потїшыть вшыткых, котры люблять лемківско русиньске слово і русиньскы співанкы, тай найде собі слухачів нелем міджі Лемками а і міджі словеньскыма Русинами.

Жрідло: http://gorlice.naszemiasto.pl/artykul/914323,powstanie-lemkowskie-radio-internetowe,id,t.html