Артос святкує десять років

28. октóбер 2014 - 12:24 послав Петро Медвідь

Преса

Общество св. Йоана Крестителя было основане Александром Духновічом в 1862 році. Існовало до року 1874 і потім было на довгы десятьріча зрушене. В 2003 році го ґрекокатолицькы русиньскы священици на Словеньску обновили. Проґрам того обчества є реліґійне, народне і културне взростаня Русинів. Общество присвячать ся роботі з дітми і молодежов на полі реліґійного жывота, духовно-релаксачным подіям, выдаваню реліґійных книжок, календарів, молитвеників, спознаваню і утримованю обряду, културы, традіцій. Орґанізація стоїть і за церьковныма літурґічныма тлумачінями в русиньскым языку.
-

По обновліню діятельности общество зачало выдавати свій кварталник під назвов Артос. Артос – то по ґрецькы хліб. Річ, без котрой чоловік не може жыти, річ, котру потребує каждый день. Такым „духовным хлібом“ ся орґанізація намагать кормити і ґрекокатолицькых Русинів на Словеньску посередництвом свого часопису. І якраз в тім часі минать десять років, од коли Общество св. Йоана Крестителя своє періодікум зачало выдавати.
-
В Артосі чітателі все найдуть много духовных статей, поясніня біблічных дій, статі, котры пояснюють нашы богосліжня, але найдеме там і статі з нашой історії, статі про нашы діти ці інформації о діятельности орґанізації. Частьов часопису є все і літурґічный календарь подля ґріґоріяньского і юліяньского штілу. Векшына статей є писана латиньскыма буквами по русиньскы подля правил словацькой транскріпції пряшівской варіанты русиньского літературного языка, але мож найти і статі писаны азбуков. Шефредактором є парох в Чабинах отець Мілан Ясик і языкову коректуру робить знамый русиньскый народный писатель Осиф Кудзей.
-
Артосу жычіме іщі многы і благы рокы жывота міджі своїма чітателями!
-
Петро Медвідь
-
Інформації о часописі: http://www.artos.wbl.sk/Najnovse-cislo-casopisu.html