Місто Пряшів было і є міцно споєне з меном славного русиньского будителя Александра Духновіча. А мож повісти, же і  його заслугов  Пряшів став ся уж дакілько років главным центром богатого культурно-сполоченьского, освітного  і церьковного діятельства Русинів. Зато уж теперь (як стало ся традіційов)   орґанізатор акції Русиньска оброда на Словеньску приправлять ся  на свою цілословеньску акцію під назвом  Духновічів Пряшів 2011. Того року  одбуде  ся його уж 12-ый рочник. Хто брав участь на такых акціях, знать о чім є реч. Про тых, котрым є таке дашто новостьов,  треба увести, же є то цілословеньскый конкурз в декламації русиньской творчости, поезії, прозы, ку котрым, правда,  належыть і духовна поезія,  сценка,  власна творчість і народны росповіданя. Зато на вас, дорогы діректоры школ, учітелі русиньского языка, школяри, членови РОС, чітателі Інфо Русина  і сімпатізанты Русинів обертаме ся з пропозіційов взяти участь в цілословеньскім конкурзі -Духновічів Пряшів 2011. Того року цілословеньскый конкурз з фінанчных прічін пересувать ся  на місяць СЕПТЕМБЕР, конкретні на 16-го септембра 2011 од 8, 30 год. на великій сцені Театра А. Духновіча в Пряшові. Тогочасный рочник понесе ідею якости перед кількістьов. Уж теперь вам обіцяме много преквапінь і нового модерного духа в комбінації з традіційов і презентаційов нашого цінного материньского слова. Без огляду на тото, ці во вашій школі учіте ся русиньскый язык, ці школяри і штуденты знають азбуку, даваме вам -їм можливость взяти участь в конкурзі і такым способом презентовати наш прекрасный русиньскый язык і літературу. Того року змагати ся буде в катеґоріях 0-5. 0. катеґорія (діти МШ і першокласникы), 1. катеґорія (діти 2-го і 3-го рочників ОШ), 2. катеґорія (діти 4-го - 6-го рочників ОШ), 3. катеґорія (школяри 7-го - 9-го рочників ОШ), 4. категорія (штуденты середніх школ, учіліщ і высокошкольска молодеж), 5. катеґорія (дорослы). Обогачены суть і окремы жанры, як : поезія, проза, властна творчость, малы сценічны формы, народне росповіданя і духовна творчость. І того року готовиме славностный акт выголошіня ЛАВРЕАТА ДУХНОВІЧОВОГО ПРЯШОВА. В двох катеґоріях - дорослый (учітель, котрый найінтензівніше і найвеце приготовлює дітей на акцію) і школярь, котрый брав дотеперь найбівшу участь в дотеперішній історії Духновічового Пряшова, або найвеце заінтересовав дотеперь пороту. Лавреат здобуде  особливу ціну - русиньского оскара  і фінанчну одміну од орґанізатора.  О Лавреатах   вырішує одборна  порота на основі пропозіцій од  орґанізаторів. Вірьте, же  мате ся на што тішыти. Окрем того, каждый участник дістане уж традічный діплом, а  выграваючі окремых катеґорій і інтересны ціны. Но іщі перед тым  треба выграти першы місця на окресных, містных або крайскых  конкурзах, бо до Пряшова бы мали прийти лем тоты найліпшы з найліпшых, котры  треба зреалізовати до 22- го юна 2011 , а потім выписати приголошіня і до 27-го юна 2011 послати на адресу Русиньской оброды, ул. Левочска ч. 9, Пряшів 08001. На копертку  треба написати  ДП. Приголошіня од

1-го юна найдете і на інтернетовых сторінках: www.rusyn.sk, або

www.molody-rusyny.sk Веце інформацій вам передаме  і на  тел. чіслі: 051 7722889, 0918 176 804 або на e-mail: sekretariat.ros@centrum.sk. До відома вам даваме, же змагати ся буде в такых катерґоріях, в якых даный участник  выграв окресне коло з чого выпливать, же катеґорії  не будуть мінити ся тым,  же в часі перебіганя  цілословеньского конкурзу буде уж новый школьскый рік. Дякуєме за порозуміня.

Одборна порота, ексклузівны гості як  і орґанізаторы  акції  уж теперь тішать ся на вашу участь! До свіданя в Пряшові 16-го септембра 2011.

За орґанізаторів Сілвія Лисінова

Prílohy:

Vyhlásenie súťaže

Sprievodný list

Príhláška